A Federación galega de Ecoloxistas en Acción ven de interpor nos xulgados de Santiago denuncia penal contra varios altos cargos da Consellería de Economía, Empresa e Innovación por non proceder a declarar a caducidade das concesións da mina de Varilongo, en Santa Comba.
Así o anunciou este colectivo por medio dun comunicado no que explican que esta mina xalleira abandonouse en 1986 e “A pesar da tentativa de converter a explotación subterránea nunha gran mina a ceo aberto, os funcionarios da Xunta informaron que debía procederse a declarar a caducidade das concesións”.
Posible prevaricación
Ecoloxistas en Acción pensa que se poideron cometer un ou varios delitos de prevaricación:”O feito de que os altos cargos denunciados, denunciando os informes previos, non teñan declarado a caducidade podería ser indiciario dun ou varios delitos de prevaricación”.
Denuncian que “non é o único favor que a Xunta lle fixo á mineira australiana en Santa Comba, pois deixou caducar un procedemento sancionador por vertidos de metais pesados que implicou a contaminación de ríos próximos, presentando estes valores de cadmio centos de veces superiores aos máximos permitidos”.
Ecoloxistas en Acción pedirá tamén ante a ONU o próximo 22 de marzo que se dictamine que foi vulnerada a Convención de Aarhus tanto neste proxecto como no de San Finx.
Demandan á Xunta que se obrigue á empresa australiana a constituír un aval de como mínimo 5 millóns de euros para garantir a restauración, peche e clausura da mina en condicións de seguridade, e advirten que en caso contrario demandarán que os altos cargos responsables que agora ven de denunciar respondan co seu propio patrimonio persoal.