O candidato socialista á alcaldía de Coristanco, José Manuel Pérez Abelenda, demandou a mellora da seguridade peonil na estrada provincial DP 1911 ao seu paso polo núcleo de A Braña, na parroquia de Erbecedo.
Visitou a zona acompañado polo secretario provincial do PSdeG e portavoz socialista na Deputación, Bernardo Fernández, ao que lle trasladou anecesidade de acometer obras que melloren a seguridade dos numerosos veciños e veciñas que se desprazan cada día a pé pola zona e que carecen dun paso peonil seguro, o que os obriga a camiñar polo borde da calzada.
“Trátase dunha zona con vivendas e os veciños trasládannos a necesidade de mellorar a seguridade, especialmente para os peóns” afirmou Pérez Abelenda.
A Deputación redactará o proxecto
O portavoz socialista na Deputación, Bernardo Fernández, confirmou que o servizo de Vías e Obras conta cunha petición da veciñanza da zona para mellorar a seguridade neste núcleo e anunciou que encargarán a redacción dun proxecto técnico para mellorar a seguridade nesta estrada provincial.
Esta pasada fin de semana tiña lugar a presentación de Pérez Abelenda como candidato á alcaldía de Coristanco.
