O Concello de Vimianzo estivo presente esta tarde en FITUR, a Feira Internacional de Turismo que se celebra en Madrid do 18 ao 22 de xaneiro, con todo o seu potencial patrimonial, turístico e cultural para continuar a súa consolidación como un dos puntos de referencia da Costa da Morte.
Hoxe, ás 18:30 horas, a alcaldesa de Vimianzo, Mónica Rodríguez, saiu á palestra do stand de TURESPAÑA para presentar unha peza audiovisual con enclaves únicos situados ao longo das 14 parroquias do municipio.
Recursos de Vimianzo
Seguindo a liña temporal e a pegada do ser humano nos diferentes elementos naturais e arquitectónicos como fío condutor, no vídeo o público poderá divisar lugares especialmente significativos para a veciñanza de Vimianzo e da comarca da Costa da Morte como son os Penedos de Pasarela e Traba; os cabalos salvaxes que dan vida ao Monte Faro; o dolmen da Pedra da Arca, enmarcado nas pegadas do megalitismo na bisbarra; o castro das Barreiras; os Batáns do Mosquetín; o cruceiro de Cheis, sobre o que ademais se está levando a cabo unha investigación para saber se é o máis antigo de Galicia; o Castelo, cuxa festa foi declarada o pasado ano como de Interese Turístico de Galicia; a tradicional Fagía de Carnés e o lugar de Cereixo, coa súa igrexa e a importancia da Translatio para, finalmente, volver
aos Penedos durante o solpor, despedindo unha xornada entre a esencia da Costa da Morte: terra, mar e historia.
A alcaldesa, Mónica Rodríguez, comezou a súa intervención agradecendo a TURESPAÑA a cesión do espazo para poder amosarlle ao mundo o noso municipio”, así como “á Ministra Maroto e a todo o seu equipo, e tamén ás persoas presentes por escoitarnos e compartir con nós un anaquiño tan especial como este”.
Quixo lembrarse tamén “de toda a veciñanza, orgullosa da nosa terra, e a persoas que tiveron parte de ‘culpa’ nos recentes descubrimentos e posta en valor do patrimonio vimiancés: Manuel Rial, Damián Álvarez, Víctor Santos, equipo técnico municipal, asociacións, visitantes…”, enfatizando que “sin eles sería imposible estar aquí hoxe”.
Rodríguez rematou a súa intervención dicindo que “sirva aquí, hoxe, este momento, como continuación a algo realmente precioso e vital para nós. Sigamos traballando coa ilusión do primeiro día para que Vimianzo continúe á vangarda, marabillando ós vosos ollos”.
NOTA DE PRENSA DO CONCELLO DE VIMIANZO
