O desexo de Ramón Vigo de que IxCee continúe activo e que o concello teña a alcaldesa “máis dictatorial da historia democrática de Cee” xunto co apoio das xentes do partido animan a Pilar Iglesias a presentarse.
Este é o texto remitido por Pilar Iglesias Lema
No día de hoxe comunico a decisión de presentar a miña candidatura á alcaldía de Cee polo Partido Independientes por Cee, IxCEE.
A renuncia do noso Secretario Xeral e exalcalde a continuar participando na política institucional e amosarnos o seu desexo de que o partido que contribuiu a fundar, hai vinteoito anos, continuase activo e con representación na corporación municipal, unido ao mandato máis alonxado das pautas de cortesía e corrección política, dirixido pola alcaldesa máis dictatorial da historia democrática de Cee e o apoio das compañeiras e compañeiros, déronme a forza necesaria para afrontar este reto que nunca estivo na miña mente.
Síntome arroupada polo cariño da veciñanza, da militancia do partido, das amizades e da familia.
Teño unha longa experiencia na política local na que comencei no ano 2007 cando Ramón Vigo me chamou para acompañalo na súa candidatura, na que fun de número catro e non saín concelleira.
Con posterioridade Ramón Vigo, xa elexido Alcalde, chamoume para ser a xefa de gabinete da alcaldía. Aí foi onde comencei a decatarme da importancia que supoñía para min adicar parte do meu tempo a arranxar, ou cando menos intentalo, os problemas da veciñanza. A esa complexa tarefa axudoume a miña capacidade de traballo, o meu talante conciliador, a miña vocación de servicio e o carácter resolutivo que sempre teño ante a vida.
Posteriormente tiven a oportunidade de ser concelleira, durante cinco anos, de Presidencia, servicios sociais, igualdade e emprego, e así coñecer de cerca uns dos grandes problemas da sociedade moderna e de contribuir a palialos na medida do posible. Neses anos fun tamén membro do goberno municipal e durante dous anos e medio a primeira tenente alcalde que me aportou unha visión global da xestión municipal.
Ofrezo toda esta experiencia política, o compromiso de non virarlle mala cara a ninguén e escoitar as vosas peticións con agarimo, no despacho ou na rúa, e co ánimo de intentar satisfacelas, na medida do posible. Unha aperta
