Mazaricos celebra unha nova edición da súa Ruta das Tapas o vindeiro sábado 3 de decembro. O Concello e os establecementos de hostalería volven promover os sabores locais, convidando a toda á veciñanza e visitantes a desfrutar de tapas elaboradas e orixinais.
Nesta edición de 2022 conforman a ruta sete locais do municipio: o restaurante EFE-EME, Casa Jurjo, a Pizzería Pinocchio, o Asador Manduca, Casa Senra, Casa Pego e o Hotel Rústico Santa Eulalia. O prezo fixo das tapas será de 2,5 €.
Sistema de votación e premios
Un ano máis, o sistema de voto funcionará a través de credenciais cuñadas. As persoas participantes na ruta poden cuñar a súa credencial en cada un dos locais aos que acudan. Nese papel poderán puntuar do 1 a o 5, ao lado do nome do establecemento correspondente, a tapa consumida atendendo a valores como o sabor e/ou a presentación e elaboración da mesma. O 1 será a puntuación máis baixa e o 5 a máis alta.
Unha vez teñan un mínimo de catro cuños, poden depositar a credencial co seu nome e teléfono de contacto nas urnas habilitadas en cada local. A mellor tapa será aquela que acade a maior puntuación por este sistema, e o establecemento que a elaborase recibirá un diploma acreditativo.
Con posterioridade á celebración da ruta, procederase a un sorteo entre todas as credenciais válidas dunha cea por valor de 80 euros en calquera dos establecementos que participan nesta Ruta das Tapas 2022.
O concelleiro de Promoción Económica de Mazaricos, Jorge Sanmartín Rial, agradeceu a todos os locais participantes a súa implicación e convidou a todas as persoas amantes da boa gastronomía a vir descubrir as tapas mazaricás. O edil engadiu que esta actividade supón «un novo impulso á hostalería local» que reafirma «o compromiso do Concello co noso tecido económico durante e despois da crise económica causada pola pandemia».
Esta Ruta das Tapas 2022 coincide temporalmente coa Semana Gandeira de Mazaricos, que se celebra do 28 de novembro ao 4 de decembro. Deste modo, as persoas asistentes a este importante evento do sector gandeiro galego terán unha oferta máis de lecer durante este fin de semana, o que supón, a xuízo de Jorge Sanmartín, «un atractivo máis para moitísima xente que vai visitarnos durante a fin de semana».
