O deputado do PSOE, Martín Seco, criticou que a Xunta de Galicia “teña paralizado” a homologación do Camiño dos Faros dende hai máis de 3 anos, que mesmo respaldaran aprobando unha iniciativa parlamentaria en 2020.
Lamenta que o executivo galego “prefira deixar esmorecer a iniciativa para modificala ao seu antollo de costas á asociación do Camiño dos Faros e aos concellos implicados, deixando de lado a posta en valor do alto interese natural, patrimonial e paisaxístico das comarcas en favor do mero uso economicista dalgún amigo do goberno galego”.
«A Xunta prefire xogar na Segunda División»
Martín Seco alertou que mentres o goberno galego mira para outro lado e mantén paralizada a homologación da ruta, “perdemos oportunidades, e mentres outros lugares e outras rutas xogan na champions league do sendeirismo, a Xunta prefire xogar en Segunda División”.
Os socialistas recriminan que “nin tan sequera se puxeron en contacto cos alcaldes afectados para ver como comezar a facer as reunións da mesa de implicados para conseguir a homologación”.
Piden que se cumpra acordo parlamentario aprobado en decembro de 2020 para desbloquear a dita homologación.
Desafía a secretaria xeral de Turismo
Desafiou á secretaria xeral de Turismo que “lle diga a verdade aos cidadáns dende Malpica ata Fisterra, dígalles que a Xunta de Galicia quere vulnerar unha iniciativa de éxito mundial para diluíla nun proxecto xeral por toda Galicia poñendo en risco o futuro desta ruta”.
Seco apostou por “un camiño dos faros tal e como está configurado actualmente, e non diluílo noutro tipo de proxecto que utilicen algúns intereses empresariais para beneficio dos amigos do goberno galego”