12.3 C
Santa Comba
domingo, noviembre 27, 2022

Venres teatrais no concello da Laracha

As artes escénicas regresarán en novembro á capital municipal da Laracha coa nova edición dos Venres Teatrais, unha das citas culturais de referencia dentro da programación anual organizada polo Concello.


O ciclo constará de cinco das pezas máis importantes do momento no panorama galego, que se interpretarán no escenario da Casa da Cultura da Laracha en todos os casos a partir das 21:00 horas e con espectáculos dirixidos a maiores de 13 anos de idade.


Neste programa haberá comedia, drama e tamén espazo para a concienciación social con obras que, pola súa temática, están incluídas no marco do programa municipal de actividades en torno á conmemoración do Día internacional para a eliminación da violencia contra as mulleres que se celebra o 25 de novembro.


A función que abrirá o pano o venres 4 de novembro será O electo, unha comedia sobre a vocación política interpretada por Fernando Coronado e Antonio Mourelos e dirixida por Cándido Pazó. Un presidente de goberno que acaba de ser elixido está a piques de dar o seu discurso de investidura, pero un tic nervioso ameaza con arruinar o acto. Un psiquiatra acode para atendelo e iníciase unha divertida e incisiva batalla dialéctica entre ambos.


O venres 11 ofrecerase Tabú, un espectáculo de Carmen Conde que nace froito das conversas recollidas con mulleres de entre 70 e 95 anos e de diferentes puntos de Galicia sobre a súa vida sexual. Trátase dun show de narración oral que ten a misión de transmitir as historias de confusión, secretismo, amor e picaresca das mulleres que son o cimento da terra galega.


O día 18, subiranse ao escenario os actores Marcos Orsi e Jouse García para protagonizar Sós dando vida a dous homes octoxenarios que se ven na obriga, polas circunstancias, de compartir piso. A obra pretende facer unha reflexión, por veces cómica e por veces máis dramática, sobre a vellez, a convivencia e a soidade que sofren moitas persoas maiores nos últimos anos de vida.


O 25 de novembro é a quenda para The Witch, de Diana Sieira. Conta a historia dunha muller acusada por bruxaría na Idade Media. Durante o espectáculo interactuará co público asistente realizando pequenos rituais a modo de xogo.


O ciclo concluirá o 2 de decembro con Miss Docet. A actriz Iria Pinheiro protagoniza esta peza de teatro documental sobre a historia de Emilia Docet, viguesa que foi coñecida como a Miss España Galeguista tras gañar ese concurso nacional de beleza no ano 1933.


En todas as funcións o acceso do público será gratuíto ata completar o aforo máximo da sala. O programa Venres Teatrais é organizado polo Concello da Laracha coa colaboración da Deputación da Coruña e o Ministerio de Igualdade a través do Pacto de Estado Contra a Violencia de Xénero.

Pódeche interesar

DEJA UNA RESPUESTA

Por favor ingrese su comentario!
Por favor ingrese su nombre aquí
Captcha verification failed!
La puntuación de usuario de captcha falló. ¡por favor contáctenos!
Concello de Val do Dubra
spot_img

Síguenos

7,820FansMe gusta
1,661SeguidoresSeguir
1,791SeguidoresSeguir
505SuscriptoresSuscribirte

Últimos artigos