O secretario xeral do PSdeG, Valentín González Formoso, mantivo unha xuntanza con alcaldes e portavoces municipais da bisbarra.
Desde Vimianzo esixiu á Xunta que “cumpra coa Costa da Morte” e que incorpore aos próximos orzamentos as obras de continuación da autovía da Costa da Morte para “que sexa unha realidade iniciada en 2023.
Que a Xunta cumpra as promesas
Lamentou que o proxecto de continuación sexa “papel mollado” e adiantou que os socialistas impulsarán iniciativas para que a infraestrutura “comece a ser unha realidade en 2023”.
Os socialistas galegos reivindican que a Xunta retome a autovía comprometida ata Fisterra, en concreto o tramo final entre Santa Irene e Calo -Vimianzo-, anunciado polo goberno galego antes das últimas eleccións autonómicas, pero que aínda está sen licitar. O líder dos socialistas galegos deu voz hoxe á reivindicación da Costa da Morte para denunciar o incumprimento dos compromisos acadados polo PP coa comarca.
Explicou que “a Costa da morte é capaz de defenderse” grazas ao seu “dinamismo” socioeconómico e a que conta “cunha sociedade francamente admirable. Sen embargo, dixo, é “imposible” ofrecer as súas “xoias e tesouros” con capacidade económica necesaria “se non se lle dota dunhas infraestruturas de acceso mínimas”.
A alcaldesa de Vimianzo, Mónica Rodríguez, resumiu que “queremos que -a infraestrutura- deixe de ser papeis e que sexa unha realidade”, como veñen prometendo dende antes das últimas eleccións autonómicas engadiu a demanda histórica do concello de que a Xunta acometa a conexión da infraestrutura co polígono empresarial da localidade.
