O vindeiro martes 5 de xullo terá lugar a presentación dun grupo de apoio a doentes de cancro e familiares. A asociación denomínase “Unha amiga sabe ver que necesitas unha aperta”.
O acto terá lugar na sala de reunións do Centro de Saúde de Santa Comba ás 13,30h. A primeira directiva estará presidida pola xalleira Ana María Ferreiro e segundo os promotores “e conta coa colaboración dun grupo ilusionado por traballlar para que se lle perda o medo a falar da enfermidade oncolóxica na nosa sociedade e crear vínculos duradeiros entre a veciñanza e os asociados, incluso a través da colaboración en actividades culturais, deportivas e na natureza que poidan unir e facer compartir tempo entre doentes e familias”.
Con esta nova asociación preténdese crearun programa de voluntariado testemuñal e social para reunir a doentes e familiares da contorna da Terra do Xallas. E tamén realizar encontros con outras asociacións de saúde e/ou orientadas ao cancro “para compartir inquedanzas e obxectivos e ir construindo unha rede de apoios para os doentes e familiares desta comarca”.
A asociación nace co apoio do cadro directivo e médico do Centro de Saúde de Santa Comba.Tamén o Concello de Santa Comba colaborará coa cesión de espazos para xuntanzas e actividades que promova a asociación.
