O alcalde de Mazaricos, Juan Blanco, está “satisfeito” coa xestión realizada polo seu goberno local pero sinala que “quero máis” e inclúe os traballadores municipais neste balance:”Estou moi a gusto cos concelleiros do goberno e cos traballadores que fan un traballo constante, non existe horario para chamar…”
Pensa que ese bo ambiente é chave para avanzar:”Fixemos unha RPT con cero alegacións e non creo que moitos concellos poidan presumir disto”.
“Mazaricos ten un potencial turístico enorme”
“Temos un proxecto lanzado fai sete anos e apostamos por esa continuidade” declarou nunha entrevista no programa “Na Encrucillada” de Radio Xallas.
Escoita a entrevista en Ivoox– desde minuto 87
“Por exemplo, en turismo, hai que ver o que era o concello de Mazaricos fai sete anos e o que é agora, como evolucionou. Temos un potencial turístico enorme”.
Na actualidade hai dous temas que teñen unha especial relevancia para o mandatario. A “Senda do Xallas” e a Residencia de Maiores de Pino do Val.
“A Senda Do Xallas vaise demorando pero contratarase este ano. Vai a ser un antes e un despois do turismo. Hai que agradecer o apoio da Deputación e como se involucrou Xosé Regueira”.
No caso da Residencia, continúan cos trámites e “dependemos da cesión do edificio” por parte da Xunta. O goberno local baralla “o modelo de Silleda”, cunha xestión privada para poder ter a opción de contratar persoal do municipio.
Lembra que o concello conta cun remanente duns 600.000 euros, cambiou o alumeado municipal, acaba de inaugurar un Campo de Tiro e promove distintas obras.
Juan Blanco, sentido común, boa xestión e máis fondos
Pero no oculta as eivas que existen:”Temos unha infraestrutura viaria inmensa con mil quilómetros de camiños. O 80% da partida de obras é para camiños, con 250.000 euros en desbroces”.
Outro problema é o do abastecemento de auga. “Imos investir medio millón de euros nun depósito de auga e nun bombeo dun millón de litros e teremos que facer unha nova captación de auga”.
“Hai que actuar con sentido común, conseguir máis recursos e facer unha xestión milimétrica dos gastos” engade o rexedor.
“Necesitamos un rural forte”
Outra adversidade é o avellentamento. Recoñece que non se pode aspirar a aumentar a poboación pero si conseguir que haxa vida nos pobos:“O meu obxectivo é conseguir que existan cero casas baldeiras en Mazaricos”.
Juan José Blanco Riveiro mantén a súa teima por dignificar estes territorios e salienta a labor dos gandeiros:”Desde a cidade non nos entenden pero para que haxa abastecemento nas neveiras ten que haber gandeiros.Necesitamos un rural forte”.
Tamén puxo en valor o importante aumento en gasto social por parte do concello, ou as melloras propostas para dotar de fibra zona de Arcos.
Escoita a entrevista aquí desde Spotify – Minuto 87
