Vodas de prata para un Asalto ao Castelo moi agardado que chega coa declaración de Festa de Interese Turístico Galego.
E no marco incomparable do Castelo de Vimianzo presentouse esta nova edición que terá os seus días grandes o venres 1 e o sábado 2 de xullo.
Asistiu o vicepresidente da Deputación, Xosé Regueira, a xefa da Área de Turismo da Xunta de Galicia, Ana Teresa Cimas; o deputado José Manuel Pequeño, a alcaldesa de Vimianzo, Mónica Rodríguez así como membros do equipo de goberno e representantes das asociación Cherinkas ou Axvalso.
Cé Orquestra Pantasma, Monoulious DOP e A Banda da Balbina
O venres pola noite actuarán Cé Orquestra Pantasma, Monoulious DOP e A Banda da Balbina, despois dunha batalla de queimadas.
O sábado 2 de xullo, o gran festival da noite contará coas actuacións de SÉS, Nativa, Talco e Tandub.
Non serán as únicas actuacións do día, xa que ao longo da xornada poñerán o carácter musical grupos como Los Jinetes del Trópico, Teima e Sapoconcho sem poncho, e mesmo haberá sesión vermú itinerante con Lilicleta.
Na medianoite do sábado, entre os concertos, chega o momento álxido da festa: o propio Asalto ao Castelo, cunha representación teatral na que o público se converte en irmandiño e asiste ao terror dos poderosos, para despois vingarse dirixíndose á fortaleza con fachos, ariete, berros e batalla de auga.
Asalto ao Castelo cheo de actividades
Unha semana antes, o sábado 25 de xuño dará comezo oficialmente a festa coa celebración da VI Legua Irmandiña, unha carreira con distancias do medievo que ten como fermosa meta no solpor o propio Castelo de Vimianzo. Para inscribirse, o prazo abrirase proximamente para as diferentes categorías en www.galitiming.com.
No día seguinte, o domingo 26 de xuño, terá lugar unha das novidades desta edición, unha emotiva ruta guiada polos escenarios e lugares da historia da festa que contará cunha subida á mítica Cruz do Loureiro.
XIII Pinchos Irmandiños
Un dos pratos fortes, literalmente, do Asalto ao Castelo de Vimianzo serán os XIII Pinchos Irmandiños que animarán a vila do martes 28 de xuño ao sábado 2 de xullo. Nesta edición, organizada pola hostalería de Vimianzo, participan propostas locais que só poden levar como ingredientes produtos que existisen no século XV en Galicia. Poderase premiar ao establecemento mellor decorado e tamén ao mellor petisco. E se se fala de gastronomía medieval, a gran referencia é a Cea Medieval que conta xa con once edicións. Xa están as entradas esgotadas. Será o venres 1 de xullo.
Onde aínda hai sitio é nas Irmandades Parroquiais da Terra de Soneira. Un emotivo desfile de veciñas e veciños da comarca histórica gobernada polo Castelo, que se xunta e prepara para a gran noite do sábado, 2 de xullo. Reunidos na praza do Concello, escoitarase o pregón da festa e levantarase a bandeira ao son da Muiñeira de Vimianzo, unha composición creada polo grupo de Burela Medio Quinhón inspirada no Asalto ao Castelo e que será presentada oficialmente nese momento.
Antes diso, pequenos e maiores gozarán do Asaltiño, unha gran batalla de auga nunha representación do Asalto adaptada para a rapazada, que será en horario de 16:30 a 17:40 horas.
Durante o resto do día grande, o sábado 2 de xullo, nas rúas de Vimianzo desenvólvese a X Feira Artesanal e haberá múltiples actividades: xogos, obradoiros de combate e moda medieval, a visita teatralizada no Castelo polo alumnado do IES Terra de Soneira e a música de rúa da A. C. Trubisquiña, Batucada As Curandeiras-Kosoko Nasera, Medio Quinhón e Batucada Rapacollón´s Big Band Fisterra.
O Asalto ao Castelo ten detrás o traballo da veciñanza e de asociacións sen ánimo de lucro. Cherinkas, AXVALSO e o Concello de Vimianzo son as entidades sobre as que recae o peso principal deste evento, mais outros colectivos da vila e comarca fan posible a celebración da festa.
