Preto de 400 persoas desfrutaron da XXIII edición da Festa do Bolo do Pote de Mazaricos, que se celebrou este domingo, 6 de marzo. Nesta ocasión, e debido á situación epidemiolóxica, a festa celebrouse exclusivamente en varios locais de hostalaría do municipio, a fin de evitar grandes aglomeracións.
O concelleiro de Promoción Económica, Jorge Sanmartín, valorou positivamente esta edición atípica, a primeira celebrada dende que comezou a pandemia de COVID-19 . “A pesar das medidas especiais con que se celebrou esta festa, rexistrouse unha asistencia que amosa que a nosa gastronomía segue xerando interese e que durante todos estes anos creamos unha grande afección por este prato”, asegurou o edil. Sanmartín agradeceu a todos os locais participantes a súa implicación na festa e ás persoas asistentes “seguir apostando polo noso, polos nosos sabores”.
Foron oito os establecementos hosteleiros que participaron nesta edición: Restaurante O Verxel, Asador Manduca, o Restaurante EFE-EME, a Pizzería Pinocchio, Casa Jurjo, Campamento Corzón e Casa Pego, coa colaboración de Casa Senra. O menú incluía bolo do pote, cocido, postre, viño e café.
NOTA DE PRENSA CONCELLO DE MAZARICOS
