-Info AXEGA 112
Os equipos de emerxencias dan por controlado o incendio que devorou por completo unha nave e puxo en perigo unha segunda en Santa Comba
Os equipos de emerxencias dan por controlado o incendio declarado no Polígono Catro Ventos de Santa Comba e centran os traballos en minimizar os efectos do lume, que xa calcinou unha nave e ameazou unha segunda.
Así, os bombeiros retiraron a un campo próximo boa parte do contido da segunda nave, destinada a almacenaxe de pacas de herba seca e fertilizantes, para manter lonxe do lume estes produtos químicos e salvagardar, así, a seguridade de bens e persoas. Con todo, o lume xa causou dous feridos, que presentaban síntomas de intoxicación por fume e un golpe na cabeza, respectivamente.
O 112 Galicia tivo coñecemento deste suceso preto das once desta mañá cando comezaron a recibirse diversas chamadas de persoas particulares alertadas por unha intensa fumareda no Polígono Catro Ventos de Santa Comba. Efectivamente, un incendio nunha nave de recollida e tratamento de residuos motivou a activación dun operativo, que se iniciou cos Bombeiros de Santa Comba, pero ao que se foron sumando máis medios debido á magnitude do lume. Así, acudiu ao punto persoal dos parques comarcais de bombeiros de Carballo e Cee, asi como membros do GES de Brión e os técnicos do Grupo de Apoio Loxístico (GALI) da Axencia Galega de Emerxencias (AXEGA) cunha motobomba con capacidade para 25.000 litros. Tamén foron mobilizados equipos de extinción de incendios forestais e axentes de seguridade local e Garda Civil e voluntarios de Protección Civil.
Sen embargo, a rápida acción do lume fixo que a primeira nave colapsase axiña, ardese por completo e puxese en perigo unha segunda instalación. Deste xeito, os equipos de emerxencias pasaron a centrar os esforzos en reducir os efectos do incendio na segunda nave, onde se gardan pacas de herba seca e fertilizantes. Precisamente, son estes produtos químicos os que cómpre manter arredados do lume, por iso, os bombeiros retiraron boa parte do combustible -as pacas de herba seca- para un campo próximo.
FOTO CONCELLO DE SANTA COMBA
