Info- AXEGA 112
Dúas persoas, un adulto e un menor, tiveron que ser trasladadas despois de accidentarse un autobús e un coche, en Vimianzo.
O 112 Galicia foi coñecedor dos feitos poucos minutos despois das dúas da tarde, mediante a chamada dunha testemuña da colisión, ocorrida no punto quilométrico 62, da AG-55, sentido Coruña. A persoa xa indicaba que ninguén estaba atrapado no interior dos vehículos pero si requiría asistencia médica.
Deste xeito, os xestores do CIAE-112 Galicia informaron aos servizos sanitarios, á Garda Civil de Tráfico, aos Bombeiros de Santa Comba e de Cee e aos membros de Protección Civil de Zas e de Vimianzo.
Ao final, a patrulla da Garda Civil de Tráfico, desprazada ata o lugar do accidente, confirmou que resultaran feridos, de carácter leve, o condutor do turismo e un menor de idade que viaxaba no autobús. Ambos os dous, foron trasladados polo persoal do 061 ao centro de saúde da localidade.Para manter a seguridade na vía, o 112 tamén lle notificou o sinistro ao Centro de Xestión de Tráfico e ao persoal de mantemento de estradas.
