A medida que se achegan as datas do Nadal multiplícanse as actividades en todo o territorio. Un exemplo é o concello de Santa Comba.
Marta Doviro, Os Bolechas e Charly Braun
O concello xa presentou o cartel do “Nadal Cultural”. O xoves 16 de decembro terá lugar a entrega de premios do concurso de postais nos centros educativos. Ao día seguinte haberá un monólogo cómico a cargo de Marta Doviro que representará “Memorias dunha rapasa da costa” a partir dás 10 da noite no auditorio do Multiusos.
O sábado 18, no mesmo espazo estarán Os Bolechas con “Crebanoces”(18:00h). O xoves 30 de decembro haberá un obradoiro de maxia (12h) para nenas e nenos a partir dos sete anos. E a mesma hora no mesmo recinto, o 7 de xaneiro actuará o Mago Charly Braun.
Soles de Galicia e Os Celtas
E o día de Noiteboa e o de Fin de Ano (de 12 a 15) a asociación de empresarios de Santa Comba organiza dous pasarrúas. O primeiro día coa actuación do mariachi “Sol de Galicia” e o segundo coa charanga OS Celtas.
Actividades da Asociación de Empresarios
Xunto con estes dous pasarúas a asociación de empresarios de Santa Comba promove unha «Campaña de Rascas» con máis de 1.000 premios directos valorados en preto de 10.000 euros. A campaña comeza o 15 de decembro e remata o 8 de xaneiro. Os «rascas» poderán conseguirse comprando no pequeno comercio.Os produtos exporanse nun escaparate da rúa Alfonso Molina.
O xoves 16 de decembro haberá un curso de tiraxe de cervexa a cargo de Laura Martínez subcampiona de España e campiona de Galicia desta actividade. Ao día seguinte desenvolverase un curso de decoración de Nadal. As dúas iniciativas serán nas oficinas da asociación e gratuitas para os asociados.
A asociación colabora co concello de Santa Comba na XV edición do concurso de escaparates de Nadal, con 1.000 euros en premios. O prazo de inscrición ábrese o 13 de decembro.Máis info na propia entidade ou nas súas redes sociais. Desde a asociación que preside Alberto Romar agradecen a cooperación das empresas asociadas para poñer en marcha esta campaña de Nadal.
Olympus e Mega CDC
E o venres 17 de decembro está prevista unha verbena promovida pola comisión de festas de Santa Comba, coa actuación da orquestra Olympus e a animación da discoteca móbil Mega CDC.
