FOTO-ARQUIVO
Xunto coa problemática eólica (crónica aquí), no pleno ordinario de novembro en Santa Comba abordaronse outros asuntos, como a modificación das ordenanzas fiscais do servizo de comedor sobre rodas e da Escola Infantil.
Modificación de ordenanzas
Eran dúas adaptacións. Por un lado para dar cobertura legal a ampliación do servizo do comedor tamén ás fins de semana, como explicou a concelleira de Servizos Sociais, Esther Espasandín(PP).
David Barbeira(CxG) lembrou que foi unha decisión adoptada durante o seu mandato, e Ucha reprochou que naquel momento “fixéronse mal as cousas” e agora tocaba regularizar “unha situación paralegal”.Carlos Turnes(PSOE) preguntou pola alternativa de implantar o servizo “Xantar na Casa”, algo que rexeitou a alcaldesa María Pose(PP) polo feito de que “co Xantar na casa lévase a comida unha vez a semana e desta forma faise un menú equilibrado cada día”. Votaron todos a favor e abstívose o PSOE.
Con respecto á Escola Infantil, tratábase de introducir a gratuidade do “segundo fillo” aprobada pola Xunta. Esther Espasandín lamentou que as familias xa se poderían estar beneficiando desta mellora pero o goberno anterior non fixo este trámite. “Eu no tiña constancia deste requerimento” xustificou Barbeira. Para Ucha Velo son “excusas de mal pagador” e para María Pose unha mostra de “deixadez”. Houbo unanimidade neste punto.
Renovación do alumeado público
Aprobouse un recoñecemento extraxudicial de crédito, que deu lugar ás críticas do PP e de Ucha á xestión de Barbeira, sobre todo, no referido a contratación dunha comercializadora eléctrica que tivo problemas económicos. O concello deberá aboar estas facturas directamente a Facenda.”É algo moi grave. Contratou con un pufero” criticou Ucha. Os non adscritos e o PSOE abstivéronse e PP e Compromiso votaron a favor.
Por unanimidade acordouse delegar competencias na alcaldía para a xestión do proxecto de renovación das instalacións de alumeado público municipal, que supón un investimento de 1.192.000 euros (cunha subvención do IDEA de 954.000 euros). E tamén se aprobou unha moción presentada polo Partido Popular (exposta polo edil José Manuel Rodríguez Torreira) de apoio ao sector lácteo.
Comisión Especial de Investigación
A cuestión máis polémica foi unha moción presentada por José Antonio Ucha para a creación dunha “Comisión Especial de Investigación” ante presuntas irregularidades e “feitos extremadamente graves” relacionados cunha “presunta modificación irregular do nivel de destino” dunha praza de técnico municipal, e con outros asuntos vencellados a filtracións de datos internos ou a un intento de acceso a información privada.
Para Ucha hai actitudes que poden ser constitutivas de presuntos delitos de malversación de caudais públicos ou falsedade documental. María Pose indicou que o concello debe velar pola “seguridade” e o PSOE pensa que “se hai sospeitas de irregularidades esta é a forma”. Para David Barbeira e algo “innecesario totalmente” e “se hai irregularides hai que actuar de oficio”.
