Cinco anos e medio de inhabilitación e multa económica para o exalcalde de Camariñas, Manuel Valeriano Alonso de León por prevaricación administrativa e negociación prohibida a funcionarios.
Esta foi a sentenza recentemente coñecida que valorou unha das promotoras da denuncia (xunto con Estrella Antelo) no programa Na Encrucillada de Radio Xallas.
“Quedou demostrado que o exalcalde de Camariñas utilizou a política para o seu beneficio. Fixo da corrupción o seu medio de vida” manifestou Carmen Suárez.
Fixo fincapé que as dilatacións no proceso supuxeron “unha rebaixa na condena” e que “o acusado buscou todos os entresixos para non sentarse no banquiño pero non tivo máis remedio. E ten tres sentenzas”.
Sobre o PSOE:»A alcaldesa é cómplice de todas as ilegalidades»
Sobre o cruce de críticas entre PSOE e PP aclarou que non está na política e que “esta non é a miña guerra” pero si reiterou unhas declaracións anteriores en Radio Xallas.
“A alcaldesa Sandra Ínsua é cómplice de todas as ilegalidades que cometeu Alonso de León. Non sei se o seu silencio e a súa pasividade é motivo de delito. Pero sempre se apoiaron mutuamente”.
Tamén lembrou ao PSOE que “poñían as mans no lume por Pichurri, agora algúns xa non necesitan guantes”. E tamén sinalou:”Pódese ganar nas urnas e ser un corrupto”.
Sobre o PP:»Non foron consecuentes»
Sobre as declaracións do portavoz do PP de Camariñas dixo:”Se tiñan tan claro que o exalcalde cometiu ilegalidades, non seguiron coa denuncia e non remataron algo que iniciaron?”.
Suárez pensa que os populares “non foron consecuentes”. Agradeceu o apoio de moitos veciños e tamén do letrado que as representou, Sebastián Lorenzo Viejo. Lembrou que Pichurri recibiu advertencias da súa conducta, e que non sacou os seguros a contratación, como era debido. “Hai cousas que non se poden xustificar”.
