O alcalde de Ponteceso, Lois García Carballido, participou no programa radiofónico “Na Encrucillada” de Radio Xallas, onde dixo respectar as recentes críticas do sindicato CSIF se ben indicou que “cando foron á xustiza déronnos a razón”.
Entrevista a Lois García desde o minuto 25
“Defender os intereses dos veciños”
Quixo deixar claro que “defendemos os intereses dos veciños” e en referencia á problemática da Policía Local manifestou que “queremos adaptarnos aos novos retos” e “dar un servizo de mañá e tarde os sete días da semana”. Afirmou que a medida xa estaba en marcha provocando “unha gran satisfacción veciñal”. Destacou o papel dos voluntarios de Protección Civil “que é unha agrupación moi activa”.
Preguntado polas queixas da oposición sobre as deficiencias das praias con bandeira azul. Recoñeceu que “todo é mellorable”, aludiu ao “bloqueo do remanente” que impide contar con recursos económicos e engadiu:”Non hai que facer mala publicidade do concello nin das nosas praias. Un político ten que falar ben do seu concello”.
Recollida de enseres e Punto Limpo
Tamén criticou a actitude de “xente irresponsable” e pediu non desfacerse dos enseres e aproveitar os servizos existentes, como o de recollida ou o Punto Limpo. E lembrou que cando se fai unha obra “as empresas teñen que ocuparse da xestión dos residuos”. Aconsellou mercar no comercio local.
