O alcalde de Zas, Manuel Muíño, fixo balance destes dous primeiros anos de lexislatura e aproveitou para adiantar en Radio Xallas a licitación dos traballos da nova praza de Baio, que saíu a concurso xusto este mesmo mércores.
Entrevista en Radio Xallas a Manuel Muíño- desde o minuto 30
“É o remate dun proceso que tivo un trámite moi complexo, pero era un dos desafíos desta lexislatura”. A outra meta era o Tanatorio municipal, que xa está en marcha, “e que está tendo un uso moi importante polo que creo que acertamos en cubrir esa necesidade”.
Muíño Espasandín tamén puxo en valor o “o bo estado” da rede viaria municipal, e a boa saúde financieira, nun tempo de lexislatura marcado pola pandemia. Anunciou que en breve presentarán os orzamentos, que están prorrogados, se ben dixo que o carácter “expansivo” dos últimos aprobados.
Na entrevista tamén falou dos servizos sociais, da Ruta da Auga, e do “optimismo” que ten con respecto ao impulso do Parque de Megalitismo. Entre os obxectivos do goberno do BNG está poder desenvolver o Polígono de Lamas que “ten unha situación estratéxica”.
Con respecto a nova praza, o proxecto denominado “Urbanización do novo campo da feira” ten un orzamento de 314.988 euros (ive incluido) e un prazo de execución de catro meses. Ata o 20 de xullo poden presentarse ofertas.
