Unha muller necesitou a axuda dos servizos de emerxencias para lograr saír do seu vehículo, despois de sufrir unha colisión contra outro turismo, no concello de Cee.
Ao fío das doce da mañá, o 112 Galicia recibiu varias chamadas de particulares que informaban dun accidente de tráfico entre dous coches na estrada comarcal AC-552, á altura do punto quilomético 89, en Xallas. As testemuñas do feito indicaban que no interior dun dos vehículos había unha persoa que non podía abrir as portas e saír.
Nese momento, os xestores do CIAE-112 alertaron aos Bombeiros de Cee, á Garda Civil de Tráfico, á Policía Local, aos membros de Protección Civil do municipio e aos servizos sanitarios. Estes últimos, ademais, indicáronlle ao 112 que xa tiñan constancia da colisión e que, segundo a información recollida, había dúas persoas feridas, unha delas atrapada.
Finalmente, a dotación de Bombeiros, desprazada ata o lugar, confirmoulle aos xestores do 112 que tivo que prestar axuda na apertura da porta dun dos turismos para lograr a saída do seu ocupante.Co fin de restablecer a seguridade na vía, desde o Centro Integrado de Atención ás Emerxencias de Galicia tamén se informou ao persoal de mantemento de estradas.
INFO-AXEGA 112
