O Bloque Nacionalista Galego vén de denunciar “un auténtico fraude avalado polo goberno local” nun proceso selectivo de persoal. Concretamente no referente á contratación temporais de oficiais de segunda de albanelería.
Segundo denuncian os nacionalistas “O Tribunal do proceso puntuou a varios aspirantes na proba de galego, sen que esta se chegase a realizar”. Un tribunal que non tivo “ningún especialista en albanelería para cualificar a proba práctica”. E tamén critican que “o tribunal duplicou actas do proceso de valoración sen dar explicacións”.
Un escándalo
”É un escándalo o que pasa no concello cada vez que hai procesos selectivos.Están tan acostumados a chanchullar que perderon a vergonza toda. É inconcibible que o tribunal outorgue puntos de balde, sen facer as probas oportunas, prexudicando aos aspirantes que non queren que saian seleccionados, como vimos de verificar revisando o expediente” declarou o portavoz do BNG, Lois Lado.
Advirte que neste caso “pode haber prevaricación” e sinala:”O alcalde apunta e o tribunal selecciona”. Consideran que o proceso foi “desastroso” e “inxusto”.
