Mari Rey e Juan David Sixto, da asociación de veciños San Xoán de Grixoa, no concello de Santa Comba, son os autores de “Somos de monte”, un xogo que se pode conseguir no portal www.somosxogo.gal.
Está indicado para maiores de seis anos, e para participar dúas persoas en cada partida. Segundo se explica nesta web “Este xogo permite desfrutar en familia dun paseo «en papel» polo noso monte. Igual que pasa no de verdade, ten subidas e baixadas e poucos tramos en liña recta”.
Sen dúbida un xogo, en galego, moi didáctico que permite tamén coñecer a flora e “compartir a aventura con familiares e/ou amigos”. Noraboa pola iniciativa.Desde a asociación de veciños San Xoán de Grixoa comparten tamén hoxe esta estupenda iniciativa nas redes sociais.
