A responsable local do BNG, Lucía Veciño, analizou a actualidade política do concello de Ponteceso nos micrófonos do programa “Na Encrucillada” de Radio Xallas.“Vivimos unha total situación de bloqueo que vén dada por unha clara situación de desgoberno e desleixo que está vivindo o concello desde hai tempo” declarou Veciño.
Entrevista Lucía Veciño (Desde o minuto 17)
A representante nacionalista fixo alusión a “unha crise de goberno que desembocou nun desgaste” e “nunha incapacidade para chegar a acordos coa oposición”·
Unha oposición que para o BNG marca “unha liña vermella lexítima” pero que debería de “priorizar”. De feito, non concordan en que esa liña sexa a da dimisión do alcalde, xa que para isto están as eleccións ou a moción de censura “pero nunca perdendo axudas”.
Preocupación e raiba no BNG pola situación de Ponteceso
Para Lucía Veciño “Ponteceso está nunha situación crítica. Non se están asumindo as responsabilidades políticas.Non se pode castigar a todo o pobo e a todo o concello “. Non oculta a “preocupación e a raiba” polo estado das cousas e sinalda que “a única responsable desta situación é a corporación” e a que ten que “buscar unha solución e chegar a acordos”.
“Non entendo porque hai que buscar culpables noutras administracións” asegura. Pensa que este problema é máis de “liorta personalista entre eles” que de “discrepancias ideolóxicas”.
