Este mércores hai pleno no concello de Ponteceso e ante o plan que previsiblemente presentará o alcalde, o Partido Popular declara:“Nós temos un plan que conta co respaldo da maioría da corporación, xa que os edís non adscritos están con nós, e o presentaremos para a súa execución en canto o alcalde deixe o seu cargo”.
O portavoz do Partido Popular de Ponteceso, Daniel García Cotelo, asegurou que, se é necesario, forzará a convocatoria dun pleno extraordinario para tratar de aprobar o Plan de Obras e Servizos de Deputación da Coruña, dotado con 758.000 euros e que non obtivo polo de agora o respaldo da corporación municipal.
DIMISIÓN POLO BEN DOS VECIÑOS
Pensa que a renuncia de Carballido sería “polo ben dos seus veciños” e “porque aínda estamos a tempo de recuperar o tempo perdido”. O portavoz popular afirma:“Nós temos toda a intención de aprobar o Plan de Obras e Servizos, e aínda temos tempo segundo dixo o presidente da Deputación aquí en Ponteceso, e para iso temos traballado ata agora e contamos co apoio da maioría da corporación. Pero é certo que chegados a este punto é condición indispensable que o alcalde dimita”.
Os populares pensan que a proposta do PSOE «non é máis que unha artimaña para ter diñeiro na caixa e pagar favores”.
