A subdelegada do Goberno, Pilar López-Rioboo, mantivo un encontro en Vimianzo coas alcaldesas e alcaldes de Muxía, Camariñas, Cee, Dumbría e Ponteceso (este último de xeito telemático). O obxecto foi falar sobre os danos da borrasca Karim.
Na xuntanza, a responsable de Protección Civil en Galicia, María Dolores Gómez, explicou o procedemento técnico a seguir para poder subsanar os danos, así como explicarlles a normativa e que danos poden ser obxecto de protección económica. Segundo esta información o prazo para presentar as solicitudes de axuda é dun mes desde o día seguinte ao de finalización do feito causante da situación de emerxencia. As subvencións en atención a determinadas necesidades derivadas de situacións de emerxencia ou natureza catastrófica, establecido no Real Decreto 307/2005, de 18 de marzo, van dirixidas a unidades familiares, corporacións locais, comunidades de propietarios ou titulares de establecementos mercantís, industriais ou de servizos. Pódese obter máis información en www.proteccioncivil.es, no apartado “Axudas e subvencións”.
«Estudaremos as posibles solucións»
Pola súa banda, López Rioboo sinalou que “estudaremos as posibles solucións para paliar os efectos da borrasca Karim e que causou danos en espazos tanto públicos como privados.”
A alcaldesa de Vimianzo quixo agradecer a vontade “tanto de Subdelegación como da subdelegada do Goberno, que hoxe nos acompaña aquí, e tamén a María Dolores, como directora de Protección Civil, para coñecer en primeira instancia os danos provocados pola borrasca Karim. Somos concellos con danos importantes e precisamos axudas, así como coñecer a cales nos podemos acoller porque os danos nas vías municipais e nos edificios públicos son considerables.”
A rexedora destacou a importancia “do mantemento diario tanto en cunetas, sumidoiros e demais espazos, xa que estas actuacións que se levan a cabo durante todo o ano minimizaron o impacto do temporal, e aínda así os danos son cuantiosos en moitos lugares de Vimianzo”, destacou.
A subdelegada visitou o cuartal da Garda Civil de Vimianzo, o paseo fluvial e a zona dos Penedos.
