O delegado territorial da Xunta, Gonzalo Trenor visitou a Gandeiría Domínguez Porteiro no concello de Santa Comba, unha das explotacións beneficiadas polas axudas da PAC.
A visita era precisamente para poñer en valor estas axudas:“Para as zonas rurais, estas axudas son as máis importantes tanto polo número de beneficiarios como polo importe concedido, e son básicas na aposta da Xunta por fomentar a competitividade da agricultura galega, para que o rural sexa sinónimo de emprendemento e xuventude e non de estancamento”.
Axudas da PAC na comarca e na provincia
A Xunta xa convocou a nova orde deste ano 2021, e que se eleva aos 205 millóns de euros, dos cales 170 millóns correspóndense cos pagamentos directos da PAC e 35 millóns de euros coas medidas de desenvolvemento rural.
Trenor explicou que na área de Santiago as axudas da PAC -orde que inclúe tanto os pagos directos á agricultura e á gandeiría como as axudas ligadas ao desenvolvemento rural, chegaron- en 2020, a máis de 3.900 agricultores e gandeiros, cun investimento de arredor de 26,7 millóns de euros. A nivel provincial, 8.355 agricultores e gandeiros da Coruña percibiron máis de 53 millóns de euros desta orde con dúas liñas de axudas.
Na visita tamén estiveron presentes a xefa territorial de Medio Rural, Mónica López e a portavoz do Partido Popular de Santa Comba, María Pose.
