O Concello de Muxía asumirá co gasto do traslado, e retorno ao seu domicilio, da veciñanza que non poida desprazarse ao centro sanitario en canto comece a campaña de vacinación.O goberno local xa ten lista a súa proposta, que levarán a pleno a vindeira semana, para investir os 157.000 euros dos fondos sociais que recibirán do POS + 2021 por parte da Deputación da Coruña.
Desde o equipo de goberno buscarase que este servizo se leve a cabo de xeito individual, para maior protección, e que o realicen os taxis de Muxía, os cales son desinfectados por parte do Concello periodicamente para proporcionar un servizo seguro.
Ademais de asumir os gastos de transporte dos veciños e veciñas que o precisen, aumentarase a partida do Servizo de Axuda no Fogar, tan necesario nestes tempos de pandemia.
O calendario de vacinación aínda non está pechado pero o executivo local xa está a traballar para telo todo a punto e proporcionar o traslado necesario aos veciños ou veciñas maiores, dependentes ou situación de vulnerabilidade que sexan chamados a recibir a súa dose.
O alcade de Muxía, Iago Toba, destacou que “esta iniciativa servirá para que os veciños e veciñas de Muxía que non teñan a posibilidade de trasladarse, poidan acudir ao centro sanitario, recibir a vacuna e voltar ao seu fogar”.
“A idea é que as persoas que vivan soas e non teñan un medio de transporte ou non poidan desprazarse con autonomía, sexan recollidos nos seus domicilios e trasladados ao centro sanitario para que poidan recibir a súa vacina”, engaden desde o goberno local.
FONTE – NOTA DE PRENSA DO CONCELLO DE MUXIA
