Foto-arquivo
A plataforma pola defensa do monte ”As Salgueiras” non ten dúbidas acerca da ilegalidade do proxecto eólico que impulsa Norvento nesta zona do concello de Ponteceso.
E inciden en dúas cuestións que consideran claves. A afección ao espazo de interese paisaxístico dos “Cantís do Canteiro”, protexido no Plan de Ordenación do Litoral(P.OL.), e porque se tivo que realizar unha avaliación de impacto xa que a o monte linda coa Rede Natura.
Entrevista a Carlos Penedo a partir do minuto 29
Desde a Plataforma e en declaracións ao programa “Na Encrucillada” de Radio Xallas, Carlos Penedo, criticou á Xunta de Galicia xa que “non responderon as alegacións” presentadas polos afectados:”Se aplican a normativa actual non hai cabida para o parque eólico, pero non queren”.
Críticas á Xunta e ao concello de Ponteceso
Ademais lamentou a “estratexia vil e de mal gusto” do goberno galego de publicar a declaración de impacto ambiental “durante a pandemia” limitando os movementos veciñais.
Penedo tamén tivo críticas para o alcalde de Ponteceso, Lois García Carballido:”O alcalde de Ponteceso é un alcalde pro empresas eólicas e non mira por nada”.
Aínda que o proxecto deste parque “xa está en fase de resolución”, desde a plataforma teñen esperanzas en frear o seu desenvolvemento. Están en contacto coa asesoría xurídica da asociación Petón do Lobo, que lles presta axuda.
