O Concello reforza a vixilancia nos café bar cantante ante as denuncias da veciñanza
O Concello de Vimianzo toma medidas ante a preocupante situación, que está a converterse nun problema de saúde pública, na contorna de diversos café bar, e envía un escrito á Xefatura Territorial da Consellería de Sanidade para amosar a colaboración, cooperación ou asistencia precisas para poñer freo a estas circunstancias.
A veciñanza do municipio trasladou queixas ao Consistorio sobre a situación nestes bares, sitos nas parroquias de Vimianzo e Castrelo, ante a crise sanitaria, non levándose neles as medidas de prevención necesarias.
O equipo de goberno local reuniuse en varias ocasións nesta semana coa subdelegada do Goberno na provincia, Pilar López-Riobóo, e co coronel Francisco Javier Jambrina, xefe da Comandancia da Garda Civil da Coruña, para analizar as actuacións necesarias. O Concello xa está tomando medidas ao respecto. Ao longo destes días a Garda Civil está a facer controis na zona e xa hai varias denuncias rexistradas. Tamén se suma á vixilancia continua a Policía Local.
“As queixas que nos traslada a veciñanza son moi preocupantes, por iso desde o Concello estamos a tomar todas as medidas que están nas nosas mans para vixiar estes lugares” indica a alcaldesa do municipio, Mónica Rodríguez. A rexedora indica que tamén se enviou un escrito á Secretaría Territorial da Consellería de Sanidade para a toma das accións oportunas ao tratarse dun problema de saúde pública. No escrito o Concello amosa a súa colaboración, cooperación ou asistencia que sexa precisa para adoptar as medidas precisas con respecto á situación.
Fonte – Nota de prensa do concello de Vimianzo
