O portavoz do Partido Popular de Mazaricos acusou ao alcalde Juan Blanco de “facer política” e de practicar un trato “discriminatorio” na instalación da subministración de auga entre os veciños do municipio.
Nun comunicado de prensa, Sergio Noya, cualificou de “intolerable” e “auténtica cacicada” esta situación que denuncia:“Non ten ningunha explicación que veciños que viven nas mesmas zonas –Lago e Alborés- e que solicitaron poder ter auga nas súas explotacións queden sen ela, mentres ven como os de á beira si a teñen”.
As Maroñas
Os populares piden explicacións ao mandatario “sobre este trato desigual entre persoas que teñen os mesmos dereitos”. Sergio Noya referiuse ao caso das Maroñas, “onde a tubaxe que dá subministración leva colocada máis de 20 anos, o goberno local non sexa capaz de enganchar o servizo para que a xente que vive aquí poida ter auga nas súas explotacións”.
O portavoz do PP declarou:“É curioso o moito que o alcalde se preocupa para que certos veciños teñan auga e, noutros casos, con moitas menos dificultades para ofrecer este servizo, leven anos sen poder tela”.
Sen orzamentos municipais
Desde o PP tamén critican que a día de hoxe o goberno local do BNG siga sen presentar os orzamentos:“O ano pasado tivemos que esperar ata o mes de novembro para ter as contas municipais e, este ano, imos polo mesmo camiño ou peor. Así é imposible ter unha planificación de actuacións que se necesitan levar a cabo como pode ser a do fornezo da auga”, concluíu Noya.
