O portavoz do BNG de Coristanco, José Antonio Andrade, demandou a posta en marcha dun plan de humanización da travesía e do centro de Coristanco xa que “ten que ser unha prioridade” para “conseguir que a xente pare e consuma”.
Sobre a xestión do goberno do PP recoñece que “hai certa vontade” e que se mellorou o entendemento nos plenos, pero hai “eivas”, por exemplo, que con motivo da pandemia “non houbera nin humildade nin valentía para recoñecer que a situación desbordounos a todos” e para contactar coa oposición co obxectivo de “adoptar medidas”.
Entrevista desde o minuto 32
Andrade pensa que hai que reforzar a asistencia domiciliaria, xa que hai un número escaso de traballadoras e “falta de estabilidade”. Tamén reclamou medidas no eido sanitario, educativo e de apoio ás empresas.
A abstención do BNG
Respondeu as críticas de Amancio Lavandeira pola abstención do Bloque nos orzamentos. Considera que non se poden “perder horas de debate nuns orzamentos que están executados nunhas ¾ partes”.
Para Andrade Figueiras o que “urxe” é traballar no orzamento do ano 2021, trazando “uns obxectivos claros”. A postura do BNG é “ir cara adiante” e non estar no pasado. Aconsella aos grupos que critican que “resolvan os problemas que teñen entre eles”.
