A conselleira de Infraestruturas e Mobilidade, Ethel Vázquez, e a alcaldesa de Vimianzo, Mónica Rodríguez, mantiveron unha xuntanza para tratar sobre o acceso ao polígono empresarial deste municipio desde a vía de altas prestacións que proxecta o Executivo galego.
A Xunta ofrece asumir o proxecto
Vázquez Mourelle propuxo a sinatura dun convenio de colaboración polo que a Xunta “se comprometería a reforzar a súa contribución ao desenvolvemento da conexión do polígono de Vimianzo coa vía de altas prestacións, pese a ser o seu desenvolvemento unha responsabilidade exclusiva do Estado, como titular do ámbito empresarial”.
Desde a Xunta insisten que o acceso é unha responsabilidade, neste caso, de Suelo Empresarial del Atlántico. Aínda así, Ethel Vázquez amosou a disposición do goberno galego, mediante este convenio, para asumir a redacción do proxecto de trazado e de construción e o tramite ata a súa aprobación, ademais de tramitar as expropiacións, deixando para Suelo Empresarial del Atlántico a financiación da construción da obra.
Son «escasas solucións» para a alcaldesa de Vimianzo
Unha solución que non convenceu á alcaldesa de Vimianzo, Mónica Rodríguez, que considera a proposta de Ethel Vázquez de ‘insuficiente debido ao calado do proxecto. Entendemos que é algo que atinxe ao interese común de moitas veciñas e veciños da contorna e non nos parece correcta a disposición da Xunta de Galicia”.
Mónica Rodríguez agradece “á conselleira por terme recibido e escoitar as miñas propostas, pero non tanto as escasas solucións que se nos plantexan para executar un problema de índole autonómica”.
Non oculta a súa preocupación “por un tema incerto neste momento, pero polo que seguiremos loitando xa que é de gran relevancia. Vimianzo ten que contar con ese enlace” afirmou.
Desde o concello de Vimianzo aseguran que existen numerosos exemplos de execución e financiación autonómica sobre vías da súa titularidade, como o correspondente á conexión da A-52 co polígono industrial de San Cibrao das Viñas.
