A candidata do BNG á presidencia da Xunta, Ana Pontón ,pediu unha gran mobilización nas urnas para abrir un tempo novo en Galicia: “ou inmobilismo do PP ou cambio galego da man do BNG”.
Tivo palabras de recoñecemento para o traballo desenvolvido polo alcalde Evencio Ferrero e dixo que unha das súas motivacións nesta cita electoral é “ser a presidenta dun Goberno aliado de Carballo”.
Deixou claro o seu compromiso coa capital de Bergantiños e dixo:“Imaxinade o paso de xigante que vai poder dar Carballo cun Goberno da Xunta que apoie as demandas deste concello”.
Pontón incidiu nesa idea no seu mitin nesta localidade:“Apoiaremos esas lexítimas demandas desde a Presidencia dun goberno galego que terá a man tendida con este concello por primeira vez en once anos”.
A candidata nacionalista referiuse a cuestións concretas:“Tendes o meu compromiso para sacar adiante a circunvalación, porque é unha demanda incontestable, porque a veciñanza ten toda a razón cando reclama un entorno seguro e con calidade de vida, e para iso é imprescindible aliviar o tráfico de vehículos pesados que hoxe cruzan a vila e darlle unha alternativa áxil comunicando con Santiago e e cara o sur do país”.
E non se esqueceu doutra cuestión prioritaria:“E o mesmo faremos coa vella demanda de poñer en marcha as infraestruturas necesarias para abastecer de auga á costa, como é o caso de Razo e Baldaio, ou para evitar as inundacións derivadas da enchentes do Río Anllóns ao seu paso polo centro do concello”.
Salientou que “Carballo e a súa comarca van pasar a ser unha prioridade da man dun goberno implicado coas necesidades deste concello e da súa veciñanza. Desde aqui o meu compromiso de que, se teño a confianza dos galegos e das galegas, a partir do 12 de xullo acabouse o tempo da discriminación e do maltrato con Carballo e empeza o tempo da colaboración e do traballo conxunto entre o Goberno galego e o goberno deste concello”.
No acto tamén participou o alcalde carballés, Evencio Ferrero e os candidatos Xoán Sande, Daniel Pérez e Mercedes Queixas.
