En Cee, Corcubión e Malpica
O cabeza de lista pola Coruña, Xosé Lois Rivas, visitou os concellos de Cee e Corcubión, onde estivo acompañado polos candidatos Serxio Domínguez(Cee), Kuka Sar(Fisterra), e polo ex alcalde de Corcubión, Rafael Mouzo, entre outros membros do BNG da Costa da Morte.
Rivas pensa que é unha “anacronía” que o centro de día de Corcubión permaneza pechado despois dun investimento publico de máis de 300 mil euros e dotado con todos os medios necesarios para dar servizo a máis de 25 familias.
Comprometeu a súa apertura sde o BNG ten responsabilidades de goberno.“O Goberno que aspira a liderar o BNG tras o 12X vai poñer ás persoas como eixo fundamental na súa acción política, atención máxima ás persoas, e en particular ás que máis o precisan e as súas familias”, remarcou Rivas no seu encontro cos membros da Asociación Boca de Sapo que reivindican, xunto ao BNG de Corcubión, a apertura do centro de día.
O candidato nacionalista tamén visitou os terreos en desuso dos antigos estaleiros de SICAR, no concello de Cee, cuxa concesión finalizou no ano 2018 e agora, explicou “a decisión para novos usos é competencia de Portos de Galicia”. Neste sentido, lembrou a intención dunha empresa para implantarse no lugar e desenvolver actividades relacionadas coa reparación de barcos. Avogou por darlle utilidade a eses terreos sempre que se manteña “o equilibrio ambiental da ría” e cos bancos de marisco existentes.
O pasado xoves, Rivas acompañaba a candidata á presidencia, Ana Pontón, nunha visita a unha explotación láctea de Mazaricos.
Ana Miranda en Malpica
Pola súa banda a portavoz do BNG en Europa, Ana Miranda visitou o concello de Malpica, onde mantivo encontros co sector oleiro, de redeiras e da confraría de pescadores. Estivo acompañada polo candidato número 6 pola Coruña, Dani Pérez e polos concelleiros Daniel Reixía e Leticia Varela.
“É imprescindible aproveitar os fondos da Unión Europea para poñer en marcha proxectos de país, que sirvan para poñer en valor o potencial que temos e para mellorar a situación económica”, salientou Miranda.
Para Ana Miranda é moi importante que as redeiras conten co recoñecemento legal da súa profesión “non só para que poidan acceder as axudas europeas, senón tamén para que poidan desempeñar o seu labor nunhas condicións dignas”. Tamén defende a idea de dinamizar o sector oleiro, sinalando que en Europa existen vilas que viven da cerámica, “algo que podería acontecer en Buño, impulsando unha economía sustentable”. Lamentou que a Xunta non explique ao sector as diversas posibilidades que existen aproveitando os fondos europeos.
