A comisión das Festas do Carme de Camariñas emitiu un comunicado aclarando que «baixo ningunha circunstancia, ten intención de celebrar verbenas nin actos multitudinarios que poidan poñer en perigo a saúde dos veciños e veciñas de Camariñas». Explican que «aínda que a lei o permitise, no o permite o sentido común».Polo tanto non teñen intención de organizar nin verbenas, nin eventos como a sardiñada, ceas , ou andainas.
Posibilidade de organizar misas e a procesión marítima
Consideran que todo isto non é incompatible con outras actividades, e se «a autoridade relixiosa estima oportuno» pretenden organizar a misa e a procesión na honra da Virxe do Carme.»Sempre que a confraría tome un acordo sobre a posible celebración da procesión marítima, estaremos ao que as autoridades nos indiquen, tanto en materia de seguridade sanitaria como de orde pública. O mesmo cabe dicir da Danza de Arcos que, de celebrarse, contará, coma sempre, coa nosa colaboración».
Desde a comisión de festas informa que «os escasos donativos obtidos serán destinados á festividade da Virxe do Monte do próximo ano». Iniciaran a recollida de donativos para esta tradicional celebración, que tiveron que suspender polo Estado de Alarma.
