Escoita a entrevista a alcaldesa de Camariñas(Min 10)
A alcaldesa de Camariñas incidiu nuha demanda na que coinciden prácticamente tódolos alcaldes e alcadesas:”Os concellos somos os que estamos vivindo o día a día.Temos competencias pero sen axudas. Nós temos que cumprir regras de gasto e déficits pero logo as administración non cumpren”.
Xestión de animais abandonados
E referiuse a xestión da pandemia, pero tamén a da vespa velutina ou a dos animais abandonados, que están sendo un auténtico “marrón” económico para os municipios.
Por exemplo a da recollida de cans e gatos “que se nos está disparando, con facturas mensuais de ata cinco mil euros”. Neste senso, Insua Rial, agarda con optimismo a intención da Deputación provincial de habilitar unha canceira provincial porque “é un gasto importantísimo”.
Medidas COVID-19
Tamén está pendente da administración provincial para artellar as axudas pola COVID-19, e aínda que xa teñen iniciativas perfiladas, están á espera, porque desde o goberno que preside Valentín González queren promover “unha liña de axudas para todos os concellos igual”.
E sobre o coronavirus, a alcaldesa destacou a ausencia de moitos casos no concello:”Foi unha experiencia única que espero que non se repita”. Tildou as primeiras datas como “días incertos” nos que “houbo que ir improvisando medidas”.
Sobre o verán e coa Semana Santa xa perdida, Sandra Insua está “esperanzada” en que haxa visitantes porque é consciente de que a hostelería “está sufrindo”.
Un ano positivo de lexislatura
Nunha entrevista no programa “Na Encrucillada” de Radio Xallas, a mandataria fixo balance deste primeiro ano “positivo” de lexislatura.Lembrou que un dos seus compromisos era “volcarse coa limpeza de rúas”, coordinada a través da creada concellaría de limpeza e ornato. Outro obxectivo era o Centro de Día. Anunciou que está negociando coa confraría de pescadores a cesión duns terreos.
Outra actuación que destacou son as obras do paseo da Ponte do Porto que “avanzan a bo ritmo” despois dos atrancos que padeceu (“foi unha obra que tivo mala sorte” precisou). Un invetsimento que “dará un novo aire á Ponte”.
En breve comezará na vila porteña a mellora da rúa do Cura e do Sixto, e o proxecto de mellora da praza de San Xurxo en Buría.Tamén dou conta da xuntanza coa Autoridade Portuaria para a mellora dos accesos ao Cabo Vilán.
