A asociación de veciños de “Grixoa de Esternande – Minas de Varilongo” propón que se destine unha parte do remanente do concello de Santa Comba, de preto de 2,5 millóns de euros, para a mellora da estrada de San Salvador.
Estrada de San Salvador, unha prioridade absoluta
Así o expresou o portavoz da entidade, Xosé Abelenda, en declaracións a Radio Xallas. Tendo en conta a existencia deste remanente e “xa que no último POS non se dedicou nin un só euro a esta estrada tan precisa”, desde a asociación plantexan que “polo menos un 10% dese diñeiro vaia adicado para esa infraestrutura” que consideran que é “unha prioridade absoluta”.
Para Xosé Abelenda, os investimentos representan “unha maneira de dinamizar a economía”. Desde a entidade queren saber “cal é a posición dos distintos partidos políticos” ante esta proposta.
Recentemente, o Partido Popular de Santa Comba, propuxo que se aproveitaran eses fondos, para apoiar a autonómos, pequenos empresarios e gandeiros.
Continúan as deficiencias na internet
Na súa intervención na radio pública xalleira tamén se referiu a mala cobertura da internet, que despois das queixas recentes “non mellorou para nada e incluso empeorou”. Deixou claro que “non é un tema exclusivo de Grixoa de Esternande”, xa que afecta a outras parroquias.