O concello de Santa Comba presentará un informe medioambiental e turístico para “evitar a instalación” dun parque éolico en Castriz.
O alcalde xalleiro, David Barbeira, mantivo unha xuntanza co xefe territorial de Enerxía e Minas, Isidoro Martínez Arca, ao que, segundo fontes municipais, lle explicou “a riqueza en canto a flora e a fauna dun espazo con humedais a carón do río Mira, no que ademais está “un dos motores turísticos da Terra do Xallas, o entorno Fluvial da Fervenza de Castriz”.
A xuntanza foi “moi positiva”, e desde a Xunta expresaron a súa disposición a aportar o devandito informe ao expediente, asegurando que este informe “será valorado antes da emisión dos informes definitivos de impacto ambiental”.
David Barbeira amosou o interese do goberno municipal por potenciar o turismo da natureza e advertiu que “de se instalaren os aeroxeneradores de 180m proxectados para monte Toural, Campelo e Bustelo, dous deles a apenas 400 metros en liña recta da fervenza, practicamente cortaría de raíz a beleza natural deses paraxes”.