A asociación de veciños de “Grixoa de Esternande – Minas de Varilongo” convoca unha manifestación para o vindeiro 4 de xaneiro, como xa adiantara este xornal.
Desde a entidade insisten na necesidade de que se acometa unha actuación urxente na estrada de Grixoa e San Salvador, que se encontra nun estado lamentable e supón un perigo para a circulación.
“Parece ser que o rural importa mui pouco, e as vidas das persoas que circulan por esta estrada menos” queixábase o presidente da asociación, Marcos Mouro, desde as redes sociais.
A manifestación, na que tamén participarán veciños de San Salvador, arrancará ás 11 desde a Casa do Concello e camiñará ata as inmedicacións da Casa da Cultura, coincidindo co día da tradicional feira xalleira.
Chamamento ós veciños de Santa Comba
Os promotores fan un chamamento á participación e non descartan máis actos reivindicativos se desde o concello de Santa Comba non se achegan solucións a súa histórica demanda.
Desde a asociación manifestan:“Pedimos a tod@s os veciñ@s de Santa Comba que se sumen para así entre tod@s poder defender a vida digna no rural. Esperamos e confiamos que a nosa voz se escoite e así poder conseguir que se nos arregle a carretera pois levamos un cuarto de século esperando. E estamos fartos de esperar por unha estrada”
