10.5 C
Santa Comba
domingo, noviembre 27, 2022

Aprobado o orzamento do concello da Laracha que ascende a 8,2 millóns de euros

Tamén foi aprobada a Conta Xeral do 2018, que se pecha en 12.088.352 euros, cun incremento do 50,71% con respecto ás previsións iniciais.

O Concello da Laracha terá un orzamento de 8.235.000 euros para o exercicio económico do ano que vén. Así foi aprobado hoxe polo Pleno cos votos a favor do grupo do goberno (Partido Popular), as abstencións dos catro edís do grupo socialista e o posicionamento en contra dos dous edís do BNG.

O alcalde, José Manuel López Varela, agradeceu o labor do departamento de intervención e cualificou os presupostos como “realistas e feitos con precaución”, avanzando que “as modificacións que haxa que realizar, faranse do mesmo xeito que nos últimos anos” co desexo de que os orzamentos “aumenten moito” durante o 2020.

Neste sentido referiuse ao outro punto da orde do día, xa que a Conta Xeral do exercicio económico 2018 –aprobada coas abstencións dos dous grupos da oposición- pechouse en 12.088.352 euros, cun incremento do 50,71% con respecto aos orzamentos iniciais “que eran moi similares aos que aprobamos para o 2020”. O balance arroxa un remanente líquido de tesourería de 2.708.189,80. O rexedor considera ambos datos “moi positivos e dos que debemos sentirnos moi orgullosos porque reflicten a realidade económica do Concello”. Destacou, ademais, o alto porcentaxe de execución (72,20%) e o estrito cumprimento dos prazos de pagamento a provedores.

Regresando aos orzamentos para o 2020, López Varela explicou que a baixada en aproximadamente dous millóns de euros con respecto aos anteriores está motivada “porque o ano pasado tiñamos comunicación de subvencións doutras administracións” para desenvolver actuacións como a renovación da iluminación pública (IDAE) e a construción do viveiro de empresas, a posta en marcha do obradoiro de emprego (ambos da Consellería de Economía, Emprego e Industria), ademais de que a transferencia da Deputación da Coruña con cargo ao Plan Único dos Concellos era 300.000 euros maior que a inicialmente prevista para 2020. Do mesmo xeito, o rexedor avanzou a previsión de incrementar os orzamentos coas achegas doutras administracións durante o próximo ano.

O alcalde tamén aclarou que na previsión de ingresos no resto de capítulos non hai cambios significativos porque “non queremos subir impostos aos veciños e manteremos os tipos impositivos no mínimo que permite a lei”.

En canto ao capítulo de gastos, máis de un de cada catro euros (2.088.000 euros) teñen por destino a protección social e a promoción do emprego, polo que un ano máis as persoas estarán no centro da política municipal. 

O capítulo de investimentos reais volve superar o millón de euros (en concreto, 1.006.241 euros), destacando a decidida aposta do goberno local por poñer en valor o patrimonio municipal. Así, están contempladas partidas para a adquisición dos terreos que albergan o menhir de Erboedo –elemento protexido polo Plan Especial de Patrimonio Cultural- e tamén a carballeira de San Fins. As outras actuacións de investimento previstas nos orzamentos centraranse na construción dunha pista polideportiva descuberta no núcleo urbano da Laracha, a mellora da rede viaria e a ampliación das redes de saneamento e a reactivación do Plan Especial de equipamentos educativos para mellorar o entorno do CEIP Otero Pedrayo.

Tamén se renova o compromiso cos estudantes e o tecido asociativo, mantendo intactas as consignacións das bolsas de estudos municipais e tamén as referidas ao apoio económico ás entidades culturais e educativas, aos clubs deportivos e aos deportistas individuais máis destacados. As aplicacións de gastos para cultura, deportes e ensino tamén permitirán manter a cantidade e calidade dos programas municipais organizados directamente polo Concello. 

Ademais contémplase a colaboración económica coa Agrupación de Voluntarios de Protección Civil, a Confraría de Pescadores de Caión (polo museo do Arquivo da Pesca), a Asociación de Comercio (ACSIL) e con todas as comisión de festas das trece parroquias que organicen actividades para celebrar o seu patrón ou outros eventos tradicionais.

López Varela  considera que estes orzamentos permitirán manter as políticas municipais porque “o que pretendemos é continuar facendo as cosas ben, igual que nos últimos anos”. O alcalde concluíu afirmando que estes presupostos están “pensados para poder dar solucións a todos os veciños, tanto aos que residen no núcleo rural máis apartado do centro do municipio como aos que viven xunto á Praza do Concello”.  

Fonte- Concello da Laracha

Pódeche interesar

DEJA UNA RESPUESTA

Por favor ingrese su comentario!
Por favor ingrese su nombre aquí
Captcha verification failed!
La puntuación de usuario de captcha falló. ¡por favor contáctenos!
Concello de Val do Dubra
spot_img

Síguenos

7,820FansMe gusta
1,661SeguidoresSeguir
1,791SeguidoresSeguir
505SuscriptoresSuscribirte

Últimos artigos