A prioridade da alcaldesa de Vimianzo é escoitar aos veciños e ir atendendo ás súas peticións”. Foto- Víctor Hugo.
A alcaldesa de Vimianzo, Mónica Rodríguez fixo un balance “satisfactorio” deste 2019 e enviou un agradecemento “aos veciños de Vimianzo por darnos a confianza” nas pasadas eleccións de maio. “Agora tócanos traballar duro por Vimianzo” asegurou Rodríguez nun concello “onde non hai filtros e as portas están abertas a tódolos veciños”. Destacou o traballo que está desenvolvendo todo o seu equipo.
Un plan de obras para atender necesidades
Precisamente a súa prioridade é “escoitar aos veciños e ir atendendo ás súas peticións”. Neste senso destacou os investimentos recollidos no POS, que ascende a 1,4 millóns de euros, e que contempla dar cobertura a varios núcleos que “non tiñan rede de auga municipal”
A pavimentación da camiño que vai por detrás do tanatorio de Baíñas, e tamén a mellora da entrada do pobo. Para a alcaldesa é outro reto:”As entradas do concello necesitan unha nova imaxe”. Ademais desenvolveranse distintas melloras e un plan de sinalización integral de todo o municipio.
“Encontrámonos con cousas incompletas ou a mal facer”
A herdanza que recibiu do anterior goberno parece que non foi a mellor. A alcaldesa socialista asegura que “encontrámonos con cousas incompletas ou a mal facer”. Na súa folla de ruta ten especial protagonismo o mantemento das parroquias, e agarda poder dispoñer “dun equipo de xente os máximos meses do ano” para acometer estas tarefas.
Tamén no 2020 quere seguir traballando na dinamización do Polígono industrial “que é estratéxico e moi completo”, coas excavacións no Castro da Barreiras, e celebrando por todo alto as vodas de prata do Asalto ao Castelo.
