A conselleira de Política Social, Fabiola García, visitou a casa niño “Areíña de Cores” de Dumbría. Estivo acompañada pola directora xeral de Familia, Amparo González, e polos concelleiros Iván Pequeño e Raúl González.
Durante a súa visita asegurou que a Xunta de Galicia seguirá a impulsar as casas niño ao facilitar aos concellos que non teñen ningún recurso de conciliación a opción de dispoñer dunha delas.O vindeiro ano o goberno galego fará unha convocatoria extraordinaria de axudas para estender este servizo ao 100% dos municipios.
Novas casas niño
Segundo explicou Fabiola García os orzamentos de 2020 inclúen unha partida de 620.000 euros que permitirá abrir casas niño en localidades que non teñen nin escola infantil nin punto de atención á infancia.
Ademais, incrementarase ata os 22.000 euros por exercicio (un 12% máis que na actualidade) a remuneración que perciben as persoas responsables das casas niño que xa levan tres anos funcionando.