Entrevista a Ovidio Rodeiro.Escoita o audio a partir do minuto 35 do audio
O delegado territorial da Xunta de Galicia manifestou que “non é certo que a Xunta discrimine á Costa da Morte.Todo o contrario” xa que se está facendo “un verdadeiro esforzo” no eido agrario, marítimo, nas infraestruturas ou no turismo.
Ovidio Rodeiro lembrou o incremento dun 34% no servizo de Axuda no Fogar, e o financiamento de obradoiros de empregos, cuadrillas de contra incendios e distintos programas:”A Xunta é a administración que máis esta investindo na Costa da Morte, con sesenta millóns de euros no último ano” sen contar o mantemento en sanidade e servizos sociais.
Apuntou que neste orzamento “presentado en tempo e forma” se destinan os primeiros fondos para “arrancar o seguinte treito da autovía da Costa da Morte” entre Baio e Berdoias, cun millón de euros. Tamén se referiu á Variante de Carballo ou ao dragado de Laxe.
Menos impostos no medio rural
“Os galegos imos a pagar menos impostos que no ano 2019” puntualizou, en referencia a redución do imposto de tranmisións patrimoniais, de sucesións ou a chamada “dedución verde” no IRPF.
Nunha entrevista no programa “Na Encrucillada” de Radio Xallas, defendeu o compromiso do goberno galego co medio rural:”Os galegos deixaron de pagar 1.500 millóns de euros que quedaron nos seus bolsillos mediante o programa de impostos cero no rural”.
O canon eólico deixou 9 millóns de euros en investimentos
Tamén respondeu ás críticas lanzadas desde algúns concellos contra o canon eólico:”É un canon que nace no 2010, que puido nacer na lexislatura do bipartito pero foi un goberno do PP quen o puxo en marcha.
Os concellos da Costa da Morte recibiron 9 millóns de euros desde que se puxo en marcha o canon eólico polo goberno de Núñez Feijóo”·
A Sogama da auga
“Plantexamos unha SOGAMA da auga para evitar irresponsabilidades, como a que pasou en Corme, no concello de Ponteceso, onde unha neglixencia acabou intoxicando a tantas persoas e familias” declarou Rodeiro.
Pensa que é importante contar cunha empresa pública para dar soporte os concellos e convidou á Deputación a “axudar aos concellos nas súas competencias”.
Sobre a polémica creada dixo: ”A Xunta investiu 232 millóns de euros no ámbito do abastecemento e saneamento que é moito máis do que se recibe polo canon da auga”.
Axudas para iniciativas no Camiño Xacobeo
Outro tema que se tratou na conversa “Na Encrucillada” foi o do Camiño de Santiago. O delegado mencionou as distintas liñas de colaboración con concellos e entidades ou a posta en marcha do programa “O Teu Xacobeo” para “reforzar o camiño e as fortalezas turísticas dos concellos”, apoiando iniciativas como a de Terras do Vákner de Dumbría, con 10.000 euros, o simposio da Translatio en Vimianzo, con 13.000 euros, Solpor de Fisterra con 24.000 euros ou Fisterra Film con 11.000 euros.
Gratuidade AG-55
Asimesmo valorou a proposta da Xunta para a gratuidade do treito Arteixo-A Coruña da AG-55:“O plantexamento de que a AG-55 sexa gratuita é porque o estado ten que construír un acceso ao porto exterior e polo tanto ofrecemos que asuma a titularidade da AG-55”.
Falouse nesta entrevista do problema dos servizos pediátricos:”Ogallá se poidera mellorar pero neste momento non hai pediatras en España. En moitas comunidades a media é dun pediatra para 1.100 nenos, e na Costa da Morte estamos nunha media de 500-600 nenos por cada pediatra”.
“O 45% dos orzamentos están destinados a gasto sanitario. Nunca na historia da autonomía se destinou tanto diñeiro a sanidade” expresou Rodeiro.
