AUDIO coa entrevista a Lavandeira a partir do minuto 30.
O candidato de Terra Galega á alcaldía de Coristanco confía en obter unha maioría absoluta nos vindeiros comicios e alertou que de non ser así o alcalde será o candidato independente e exalcalde Antonio Pensado Plágaro xa que advirte que “todos os demais van a loitar e irán contra Terra Galega”. Por este motivo pide “unha maioría ampla para poder gobernar e non estar atados a acordos que nos pasen factura”.
“Temos capacidade suficiente para facer ben as cousas”
Para Amancio Lavandeira o seu goberno demostrou “capacidade suficiente para facer ben as cousas” xa que “en dous anos sacamos a flote o concello e deixamos proxectos aprobados que non foron capaces de levalos a cabo”.Sobre o goberno tripartito lamentou que “certas persoas non estiveron á altura” e arrepíntese de “confiar en persoas que nos deron a espalda” a pesar dos “acordos que había”.
“Este goberno é unha mala copia do que xa tiñamos”
Para o líder de Tega, o actual goberno de Abraham Gerpe “é unha mala copia do que xa tiñamos”, pero aspira que haxa unha reacción:”Teño toda a ilusión de que isto realmente cambie e situar a Coristanco onde se merece”. A súa prioridade sería “sacar todas as obras que están paradas” e “dar un servizos acorde aos impostos que pagan os veciños”.
Amancio Lavandeira negou que realice ataques persoais destrutivos tal e como denunciou Gerpe:”Poden verse as nosas declaracións. Eu non me meto no ámbito persoal pero a el non lle gusta que lle leven a contraria”.
