Acordo para continuar cos programas de prevención do deterioro cognitivo e o servizo de atención temperá.
A consellería de Política Social aumentou en máis dun 20%, as horas do Servizo de Axuda no Fogar no concello de Santa Comba ata chegar a un total de 34.000 horas anuais.
Segundo indica a Xunta nun comunicado “o incremento desta prestación permitirá seguir a ampliar o número de persoas beneficiarias pola mesma e superar o 90% de ratio de cobertura que rexistra na actualidade esta vila”.
Esta foi unha das cuestión abordadas nun encontro recente entre a conselleira, Fabiola García, e a alcaldesa xalleira, María Pose. A xuntanza tamén contou coa presenza da concelleira de Servizos Sociais, Esther Espasandín.
Colaboración entre Xunta e concello de Santa Comba
Tamén se falou “da colaboración aberta o exercicio pasado para a realización de accións dirixidas a previr o deterioro cognitivo deste colectivo”. Fabiola García e María Pose trataron sobre a posibilidade de renovar esta iniciativa “e tamén a achega económica que recibiu o cocello en 2018 para a prestación de servizos de atención temperá”.
Segundo a Xunta “Fabiola García e a rexedora de Santa Comba acordaron continuar con esta liña de colaboración e diálogo institucional na procura de que os veciños e veciñas deste municipio coruñés teñan á súa disposición uns servizos e recursos sociais próximos e de calidade”.
