Os socialistas propoñen recuperar o espírito deste evento// Critican o “minifundismo electoralista” do goberno en materia de festas.
Un referente festivo en Mazaricos
O portavoz do Partido Socialista de Mazaricos, Francisco Javier González Trillo, reivindica que se celebre no concello “unha festa de referencia como teñen outros concellos e que nós tiñamos coa Festa da Fervenza, grazas á iniciativa da veciñanza de San Cosme e o impulso que recibiu do concello a partires do goberno do BNG nos anos 90”.
González Trillo recrimínalle ao actual alcalde “a falta de apoio do concello á Festa da Fervenza “que deixou de celebrarse no 2011 coincidindo co desenvolvemento da Operación Orquestra, na que o concello de Mazaricos se vira dalgún xeito implicado”.
Nun comunicado de prensa os socialistas aseguran que entenden “as preferencias, os estilos de diversión e mesmo condicionantes relativos á seguridade e ao medio ambiente poden desaconsellar retomar o modelo de festexo que se facía ata o ano 2011, pero iso non pode impedir que a veciñanza teña un referente festivo e de exaltación gastronómica coma calquera outro concello que se prece”.
Reinventar a Festa da Fervenza
Javier González acusa ao alcalde de implantar o “minifundismo electoralista” en materia de festas. “Este home, que tiña un plan para cada problema, agora pretende partillar por parroquias as axudas económicas e a colaboración municipal, coa única pretensión de sacar rendemento electoral da xogada”.
Propoñen recuperar o “espírito da Fervenza” e piden “reinventar a festa”. Desde o PSOE demanda un cambio de actitude no goberno local de Mazaricos “e se impulsen actividades que sirvan para reivindicar a calidade dos nosos produtos e a nosa capacidade para aglutinar á mocidade e ás familias en torno a unha fórmula de entretemento cultural cuxa potencia permita volver a facer de Mazaricos o concello de referencia do calendario de festas de Galicia na segunda semana de agosto”.
