Obradoiros creativos, sesión de contacontos, exposicións, actuacións musicais e homenaxe aos maiores.
.jpg)
Xarope Tulú
Foto- Victoria Moreno, a autora homenaxeada.
O concello da Laracha celebra as Letras Galegas con distintas actividades que arrancaron este luns cun obradoiro creativo na biblioteca da Laracha a cargo de Chévere Producións (“Cartas de amor a Alfombriña I”) e o martes na biblioteca de Caión a cargo de Pedras (“A galiña dos ovos de conto”). O luns 21 terá lugar o último destes obradoiros con Chévere na biblioteca municipal.
Na programación tamén destacan dúas sesións de contacontos. Este mércores 16 de maio a compañía Xarope Tulú representará a partir das 18,00h a obra “María e os ollos alabarados”.O venres será a quenda de Teatro Calavera con Chocolate, na biblioteca de Paiosaco(18,00h.).
O sábado 19 o pavillón do IES Agra de Leborís acolle unha nova edición da “Homenaxe aos nosos maiores” e o domingo a explanada do instituto será o epicentro dunha actuación das asociación culturais Santa María de Torás, Queiroa e Arume.
O cartel do concello da Laracha complétase coa exposición dos traballos realizados nos cursos municipais, que será inaugurada no baixo da biblioteca municipal o venres 18 ás 20,00h e permanecerá operativa ata o mércores 23 de maio. Os traballos tamén se poderán ver desde o 25 de maio no centro sociocultural de Paiosaco e na antiga reitoral de Caión.
