González Trillo pregunta porque non se convidou á oposición.
O portavoz local do Partido Socialista de Mazaricos, Javier González Trillo, difundiu un comunicado no que pide explicacións ao alcalde, Juan Blanco, sobre o Xantar das Persoas Maiores que se celebrou a pasada fin de semana.
González critica a presenza de “camaradas” do rexedor no evento que “presuntamente foron convidados cos cartos de todos e todas e cuxa presencia non se explica en termos de relación co acto” e pregunta pola non invitación dos concelleiros da oposición, destacando a ausencia de membros do goberno municipal como é o caso da da concelleira de Servizos Sociais, Katy Beiro.
González percibe un transfondo político
González Trillo cualifica de lamentable que “ o rexedor poida ter intentado converter a festa dos maiores nun xantar de aproximación a estas persoas ca fin de ir renovando a lista de cara aos vindeiros comicios municipais”.
O secretario de Emprendemento da Executiva Provincial do PSdeG-PSOE insta ao alcalde “a comparecer de xeito voluntario no vindeiro pleno ordinario ca fin de clarexar os criterios de invitación a esta Homenaxe dos Maiores e as razón polas que se escolleron determinadas persoas e asociacións, en detrimento de outras”.
