O alcalde de Vimianzo percibe intereses “que teñen que ver máis con cuestións económicas”.
O alcalde de Vimianzo, Manuel Antelo, declarou que era “unha pena tirar cunha casa que se podía legalizar” mediante a modificación que se está impulsando e amosouse “bastante ofendido” coa situación xerada.
Nunha entrevista en Radio Nordés- Cadena Ser, Antelo Pazos, asegurou que se estaba “montando un espectáculo tremendo” que respondía “a outro tipo de intereses que teñen que ver máis con cuestións económicas” e recriminou a postura de Evaristo Blanco:”A maior forma de ter publicidade é invertarse unha historia contra un alcalde”.
Estado de alarma social
O rexedor augurou que Blanco “nos próximos días presentará unha denuncia contra o concello de Vimianzo” e criticou a presenza dos concelleiros do Partido Popular e Terra Galega, aos que o veciño de Bamiro “debería pedirlle explicacións” por pertencer ao mesmo partido da Xunta(PP) ou por formar parte do anterior goberno(Tega).
Manuel Antelo Pazos tamén engadiu:”Algún empresario de Ponteceso poderíanos contar como actúa esta xente”. Ademais referiuse ao “ton ameazante” das afirmacións de Evaristo Blanco e lamentou que se pretenda crear “un estado de alarma social”, aclarando que había “moitos recursos” antes de ter que tirar coa casa de O Ceán.
