O alcalde de Muxía agarda que este martes se aclaren as dúbidas que existen ao respecto.
O alcalde de Muxía, Félix Porto, amosou a súa preocupación pola situación dada pola presenza da couza guatemalteca no concello:”Estamos preocupados pola desinformación e pola falta de control” declarou o rexedor nos micrófonos do programa Galicia por Diante da Radio Galega.
Félix Porto detecta “un fallo de control” e asegura que a preocupación tamén afecta aos concellos limítrofes de Camariñas, Vimianzo, Dumbría, Cee e Fisterra.
Transparencia e información
Agarda as explicacións que darán mañá martes (ás 9 da noite no edificio de servizos múltiples) os técnicos da Xunta e afirma que agora hai que “ser totalmente transparentes e trasladar toda a información á xente”. Indicou que está á espera de coñecer os detalles das medidas decretadas e posibles indemnizacións.
O alcalde resaltou que en Muxía “hai unha produción significativa” de pataca na maioría das parroquias.Hoxe publicábase no Diario Oficial de Galicia a resolución na que se declaraba ao concello como zona infestada pola praga da couza guatemalteca.
